قصة الكندرة المهترية

السلام عليكم ورحمة الله وبركاته

كيفكن

كويس الحمد لله

هي القصة اللي كتبتها بعنوان

الكندرة المهترية

تأليف أخوكم المهند

كان ياما كان بالقديم مو من زمان كان في بنت حلوة كتير اسمها
..... سموها متل مابدكن .....
عايشة عند جدتها المريضة وعم تراعيها بآخر عمرها

اجت هالبنت لعند جدتها وسألتها ( أنا بدي روح اقطف شوية فواكه شو مشتهية جبلك )

قالتلها ( بدي كيوي وفريز ) شفتو نحنا الشباب عودنا الختايرة على أشياء ماكانو يشوفوها بحياتهن

والله هالبنت راحت عالحديقة وبلشت تقطف بهالكيوي والفريز

وإذ كان عم يراقبها الذئب من تحت لتحت وركض عالسريع على بيتها

وأكل جدتها ولبس تيابها وعمل حالو الجدة

وتسطح على هلتخت

لما رجعت البنت شافت جدتها ( اللي هوي الذئب ) ونط الذئب هديك النطة وكان بدو ياكلها

هربت البنت برات البيت وصارت تبكي حزينة على جدتها اللي أكلها الذئب

طيب ... وبعدين ... وين بدها تعيش .. مافي بيت تسكن فيه

بس بعدين اتذكرت انو في عندها خالتها اللي شايفي حالها بجمالها

ومابتحبها بس شو بدها تعمل ... مجبورة ياخطي

شالت هالموبايل واتصلت لعند خالتها اللي عايشة بالقصر الكبير

ألو كيفك خالتو أنا صار معي هيك هيك

طيب خالتو تعي لعندي أنا مشتاقتلك وبدي شوفك

مابعرفك وانتي كبيرة تركتك وانتي لساتك بيضة مافقستي

راحت هالبنت وأخدت تكسي عالقصر اللي عايشة فيها خالتها

وصلت البنت وإذ خالتها تدايقت كتير لما شافتها ( طبعاً البنت حلوة كتير ) والخالة شايفي حالها بجمالها واتصورت انو البنت أحلى منها

وصارت الخالة تتوسوس وتروح لعند المراية وتسألها ( مين أحلى أنا ولا بنت أختي ؟)

المراية تجاوبها ( بدها سؤال يا أحلى الحلوات ... طبعاً بنت أختك خخخخخ )

وتتنكرز وتدايق هالخالة وكل يوم على هالحالة مع المراية

بالآخر قررت الخالة انها تقتل البنت

بس البنت حست على هالخالة انها بدها تدايقها وبيوم من الأيام

هربت هالبنت من القصر بالليل وراحت نامت بالشارع ياخطي لابيت تسكن فيه لك حتى قن الجاج في ازمة سكن عليهن خخخخخخ

تاني يوم الصبح فاقت هالبنت من نومها وراحت لعند أبو جبري البقال وقالتلو عطيني 200 وحدة رصيد من بطاقة ( ياألو ) مسبقة الدفع

أخدت البطاقة وراحت لما اجا العم أب جبري وقال ( الحساب يابنتي)

قالتلو سجلها على خالتي اللي عايشة بالقصر
واتصلت لعند مين ؟؟ ............. اتصلت لعند الأقزام السبعة

بس الاقزام السبعة كان خطهم مسكر لأنهن عايشين ببيت خارج التغطية خخخخخ

المهم دارت وفتلت هالبنت وقررت تفوت على قصر من هاقصور وتشتغل خدامة عند الجماعة اللي ساكنين فيها

والجماعة اللي هنيك كانو سكانهن عبارة عن أم وبنتين وشب

والشب بيطير العقل

عاشت هالبنت خدامة عند الجماعة بهالقصر

وكانو البنات والأم يعاملوها معاملة كتير سيئة

وتتعذب هالبنت بس شو بدها تساوي هاد نصيبها

وبيوم من هالأيام والبنت بلشت تتعلق بهالشب الحلو

كان في حفلة كبيرة بالقصر

وإذ شافت البنت ساحرة حبابة كتير وقالتلها " رح لبسك أحلى لبس مشان تكوني حلوة ويعجب فيكي الأمير ( اللي هوي الشب الحلو

) بس لازم تغادري القصر قبل الساعة 12 بالليل مشان مايرجع شكلك متل ماكنتي وتصيري فضيحة بالحفلة ومشان السكن ترى انا اشتريتلك بيت بشارع الغوطة قبل محطة البنزين "

وافقت البنت واجت الساحرة تاني يوم بمنطقة بعدية عن القصر مشان ماحدى يشوفها قبل وقت الحفلة " وأبرا كدبرا " صارت البنت بتطير العقل لبس وجمال وعين الله عليها

وصلت البنت عالحفلة بسيارة ليموزين وشافها الأمير وحبها كتير وصار بدو يرقص معاها والبنت صار وجهها متل الخوخة من خجلها

وافقت ترقص معو وفعلاً صارت ترقص معو

وإذ ياجماعة صارت الساعة 12 الا دقيقتين يعني باقي دقيقتين بس

وبترجع الأميرة خدامة

تركت الشب وهربت وصار الأمير يلحقها وهيي راكدة شلحت كندرتها بالغلط وتركتها وضلت هرباني

شال الأمير هالكندرة وأخدها معو

تاني يوم صار بدو يدور على حبيبتو الأميرة يعلملها عالموبايل ماترد عليه يبعتلها رسايل ماتجاوبو قام خطرت على بالو فكرة

حط هالكندرة قدام كل البنات اللي بهالمنطقة

وقال " يابنات اللي بتلبس هالكندرة وبتجي على قياسها رح اتجوزها "

وفعلاً اجو بنت ورا بنت عم يقيسوها حتى الكندرة اهترت وانشئت

وتوتي توتي خلصت الحتوتي

والخلاصة
( الكندرة اللي حكينا عنها ...ببساطة صارت للكب )

دمتم بخير
والسلام عليكم ورحمة الله وبركاته

اقتباس :: وشافها الأمير وحبها كتير وصار بدو يرقص معاها والبنت صار وجهها متل الخوخة من خجلها

ههههههههههههههههههههههههههههههه كتير كتير حلوة قصة هالكندرة .. مشكورين والله قصة مميزة بحياتي ما سمعت فيها ^^

شكرا لمروركم